کیا متحدہ عرب امارات نے پاکستانیوں کے لیے ویزے بند کر دیے؟ حقیقت سامنے آگئی

دبئی (22 اکتوبر 2025): متحدہ عرب امارات کی حکومت نے پاکستانی شہریوں کے لیے ویزا پالیسی میں کسی مکمل پابندی کی تردید کر دی ہے۔ حکام کے مطابق پاکستانی شہری اب بھی متحدہ عرب امارات کے لیے سیاحتی، رہائشی اور ورک ویزا کے لیے درخواست دے سکتے ہیں، البتہ کچھ زمروں میں درخواستوں کی جانچ پڑتال میں سختی اور تاخیر دیکھی جا رہی ہے۔

ذرائع کے مطابق اماراتی امیگریشن حکام نے ویزا پراسیسنگ کے قواعد میں چند تبدیلیاں کی ہیں تاکہ جعلی یا نامکمل دستاویزات کے کیسز کو کم کیا جا سکے۔ اسی وجہ سے پاکستانی درخواست دہندگان کو حالیہ مہینوں میں زیادہ تفصیلی سیکیورٹی کلیئرنس اور دستاویزاتی تصدیق کا سامنا کرنا پڑا ہے۔

2025 کے آغاز میں متحدہ عرب امارات نے پاکستانی شہریوں کے لیے پانچ سالہ ملٹی پل انٹری ویزا کا اجرا کیا تھا۔ اس کے بعد اماراتی حکام نے واضح کیا کہ پاکستانی شہری باقاعدہ طریقہ کار کے تحت تمام ویزا کیٹیگریز کے لیے درخواست دے سکتے ہیں۔

تاہم، ویزا مسترد ہونے یا تاخیر کی بنیادی وجوہات میں جعلی شناختی یا سفری دستاویزات، ویزا کی مدت ختم ہونے کے بعد قیام، یا منفی امیگریشن ریکارڈ شامل ہیں۔ اماراتی حکام کا کہنا ہے کہ یہ سختی صرف پاکستانیوں پر نہیں بلکہ تمام ممالک کے شہریوں پر یکساں لاگو ہے۔

حالیہ اصلاحات کے تحت ہر ویزا درخواست کے لیے ہوٹل بکنگ، واپسی کی ایئر ٹکٹ، مالی ثبوت، اور سیکیورٹی کلیئرنس جیسے نئے تقاضے شامل کیے گئے ہیں۔ پاکستانی شہریوں کی بڑی تعداد کی فائلیں ان شرائط پر پوری نہ اترنے کے باعث زیرِ غور یا مسترد ہوئیں، جس سے یہ تاثر پیدا ہوا کہ ویزے بند کر دیے گئے ہیں۔

اماراتی حکام کے مطابق ایسا کوئی فیصلہ نہیں کیا گیا کہ پاکستانیوں کے لیے ویزے مکمل طور پر بند کیے جائیں۔ البتہ، درخواست گزاروں کو مشورہ دیا گیا ہے کہ وہ تمام مطلوبہ دستاویزات درست اور مکمل فراہم کریں تاکہ تاخیر سے بچا جا سکے۔

واضح رہے کہ حالیہ مہینوں میں سوشل میڈیا پر ویزا پابندیوں سے متعلق متعدد افواہیں گردش کر رہی تھیں، جنہیں اب متحدہ عرب امارات کے حکام نے بے بنیاد قرار دیا ہے۔